Black Movie OTT Review: తమిళ హీరో జీవా (Jiiva) ‘రంగం’తో తెలుగులో కూడా మంచి పేరు సంపాదించుకున్నాడు. కానీ ఆ తర్వాత జీవాకి సరైన హిట్ పడలేదు. ఇన్నాళ్లకి ‘బ్లాక్’ అనే తమిళ సినిమాతో థియేటర్ల దగ్గర హిట్ కొట్టాడు. ఈ సైన్స్ ఫిక్షన్ థ్రిల్లర్ ఇప్పుడు అమెజాన్ ప్రైమ్ ఓటీటీలో స్ట్రీమ్ అవుతోంది. తమిళ ప్రేక్షకులకు కనెక్ట్ అయిన ఈ సినిమా తెలుగు ఆడియన్స్‌కు కనెక్ట్ అవుతుందా? అసలు ఈ థ్రిల్లర్‌లో అంత బ్లాక్‌బస్టర్ ఎలిమెంట్స్ ఏం ఉన్నాయి?
కథ: 1964లో కథ ప్రారంభం అవుతుంది. గణేష్ (రాజా రుద్రకోడి), లలిత (సింధూరి) ప్రేమించుకుంటారు. కానీ వారి ప్రేమకు పెద్దలు అంగీకరించకపోవడంతో పెళ్లికి సాయం చేయమని స్నేహితుడు మనోహర్‌ను (వివేక్ ప్రసన్న) కోరతారు. మనోహర్ వారిద్దరినీ చెన్నైలోని బీచ్‌కు సమీపంలో ఉన్న తన విల్లాలో ఉంచి తర్వాతి రోజు ఉదయం పెళ్లి చేయాలనుకుంటాడు. కాలేజీ రోజుల్లో మనోహర్ కూడా లలితను ప్రేమిస్తాడు. కానీ ఆమె గణేష్‌ను ప్రేమించిందని ఉక్రోషం పెంచుకుంటాడు. అక్కడి నుంచి బయల్దేరి వెళ్లిపోయాక దారిలో వారిని చంపేయాలని గన్ తీసుకుని మళ్లీ వెనక్కి వస్తాడు. కానీ మనోహర్ వచ్చేసరికి వాళ్లని ఎవరో గన్‌తో కాల్చేసి ఉంటారు. షాక్ అయి మనోహర్‌ని ఏం జరిగిందని అడుగుతాడు. అప్పుడు మనోహర్… గణేష్ చెవిలో చెప్పిన సమాధానం విని షాక్ అవుతాడు.
60 సంవత్సరాలు గడిచాక అదే ప్రాంతంలో కట్టిన విల్లాను వసంత్ (జీవా), అరణ్య (ప్రియా భవానీ శంకర్) కొనుక్కుంటారు. వీకెండ్‌లో సరదాగా ఒకరోజు అక్కడ గడుపుదాం అని విల్లా రెడీ అవ్వకముందే వస్తారు. విల్లాల్లో దిగిన ఫస్ట్ కస్టమర్లు మీరే అని అక్కడి మేనేజ్‌మెంట్ సిబ్బంది చెబుతారు. రాత్రి కాగానే అక్కడ విచిత్రమైన సంఘటనలు జరగడం మొదలవుతాయి. తమకు ఎదురుగా ఉన్న విల్లాలో ఎవరో ఉన్నారని అనిపిస్తుంది. వెళ్లి చూస్తే అందులో కూడా వసంత్, అరణ్యలే ఉంటారు. అసలక్కడ ఏం జరిగింది? వీరికి ఎదురుగా ఉన్న విల్లాలో దిగింది ఎవరు? గణేష్, లలితలను చంపింది ఎవరు? అసలు ఆ ప్రాంతంలో ఏం జరిగింది? అనేది తెలియాలంటే సినిమా చూడాల్సిందే!
విశ్లేషణ: 2013లో వచ్చిన ‘కోహరెన్స్’ అనే సినిమాకు అడాప్టేషన్‌గా ‘బ్లాక్’ను తెరకెక్కించాడు దర్శకుడు కేజీ బాలసుబ్రమణి. కోర్ సైన్స్ ఫిక్షన్ థీమ్‌లో మార్పులు చేయకపోయినా చుట్టుపక్కల ఉండే ఎలిమెంట్స్‌లో చాలా మార్పులు చేశాడు. నిజానికి ఒరిజినల్‌లో ఎనిమిది మంది ఫ్రెండ్స్‌కు ఈ సంఘటనలు జరుగుతాయి. కానీ ఇక్కడ ఒక జంట మాత్రమే ఉంటుంది. ఇండియన్ ఆడియన్స్ నేటివిటీకి తగ్గట్లు ఇలా చాలా మార్పులు ఉన్నాయి. కాబట్టి ఒరిజినల్ చూసిన వారికి ఒక కొత్త ఫీలింగ్ కలుగుతుంది.
సినిమా చాలా ఇంట్రస్టింగ్‌గా స్టార్ట్ అవుతుంది. పీరియాడిక్ పోర్షన్లతోనే సినిమా మీద ఇంట్రస్ట్ పెరుగుతుంది. కథ 2024కు షిఫ్ట్ అయ్యాక కాస్త స్లో అవుతుంది. జీవా, ప్రియా భవానీ శంకర్‌లు విల్లాకు వచ్చే వరకు జరిగే 20 నిమిషాల ఎపిసోడ్‌లో కథకు కీలకం అయ్యేవి ఏమీ ఉండవు. దీంతో కాస్త డీవియేషన్ వచ్చిన ఫీలింగ్ కలుగుతుంది. కానీ విల్లాకు వచ్చాక నైట్ అవ్వగానే కథ ఊపందుకుంటుంది. ముఖ్యంగా సస్పెన్స్ రివీల్ అయ్యే సీన్లు బాగా డిజైన్ చేశారు.
సరిగ్గా 60 సంవత్సరాలకు ఒకసారి అక్కడ ఎందుకు ఇలా జరుగుతుంది? విల్లాలు కట్టకముందు ఆ ప్రాంతంలో ఏం జరిగింది అని రివీల్ చేసే సమయంలో సైన్స్ ఫిక్షన్ డిటైల్స్ సరిగ్గా చెప్పలేకపోతే ఆడియన్స్‌కు అర్థం అవ్వకుండా పోయే అవకాశం ఉంది. కానీ వాటన్నిటినీ బాగా డీల్ చేశారు. ముఖ్యంగా క్లైమ్యాక్స్ అయితే సినిమాకు హైలెట్.
Also Read: బఘీర రివ్యూ: ప్రశాంత్ నీల్ రాసిన బెంగళూరు బ్యాట్‌మ్యాన్ కథ – సినిమా ఎలా ఉంది?
శామ్ సీఎస్ అందించిన బ్యాక్‌గ్రౌండ్ స్కోర్ ఈ సినిమాకు చాలా పెద్ద ప్లస్. కొన్ని సీన్లను బ్యాక్‌గ్రౌండ్ స్కోర్ బాగా ఎలివేట్ చేసింది. సినిమా రన్ కేవలం ఒక గంటా 58 నిమిషాలు మాత్రమే. ఇలాంటి ఎక్స్‌పెరిమెంటల్ సైన్స్‌ఫిక్షన్ సినిమాకు ఇది పర్‌ఫెక్ట్ రన్‌టైమ్.
ఇక నటీనటుల విషయానికి వస్తే… సినిమాలో ప్రధాన పాత్రలు రెండే. జీవా, ప్రియా భవాని శంకర్ తమ పాత్రలకు పర్‌ఫెక్ట్‌గా జస్టిస్ చేశారు.
ఓవరాల్‌గా చెప్పాలంటే… ఓటీటీలో మంచి సస్పెన్స్ థ్రిల్లర్ లేదా సైన్స్‌ఫిక్షన్ సినిమా చూడాలనుకుంటే ‘బ్లాక్’ మిమ్మల్ని ఏ మాత్రం నిరాశ పరచదు. అమెజాన్ ప్రైమ్ వీడియో ప్లాట్‌ఫాంలో ఈ సినిమా స్ట్రీమ్ అవుతుంది. తెలుగు ఆడియో అందుబాటులో లేదు కానీ సబ్‌టైటిల్స్‌లో సినిమా ఎంజాయ్ చేయవచ్చు.
మరిన్ని చూడండి
