<div>స్వదేశంలో జరుగుతున్న ప్రపంచకప్‌లో వరుస విజయాలతో ఊపుమీదున్న టీమిండియా మరో కీలక సమరానికి సిద్ధమైంది. పూణేలోని మహారాష్ట్ర క్రికెట్ అసోసియేషన్ మైదానంలో బంగ్లాదేశ్‌తో అమీతుమీ తేల్చుకోనుంది. గతంలో చాలాసార్లు టీమిండియాకు షాక్‌ ఇచ్చిన బంగ్లా పులులు… మళ్లీ షాక్‌ ఇవ్వాలని పట్టుదలతో ఉన్నారు. అయితే టీమిండియా పాకిస్థాన్‌తో ఆడిన జట్టుతోనే బరిలోకి దిగుతుందా లేక మార్పులేమైనా ఉంటాయా అన్న సందేహం క్రికెట్‌ అభిమానులకు ఉత్పన్నమవుతోంది. దీనిపై టీమిండియా బౌలింగ్‌ కోచ్‌ పరాస్‌ మాంబ్రే స్పందించాడు. ఈ ప్రపంచకప్ విజయాల పరంపర కొనసాగించడమే తమ మొదటి ప్రాధాన్యత అని పరాస్ మాంబ్రే స్పష్టం చేశాడు. ప్రపంచకప్‌లో వరుసగా నాలుగో విజయాన్ని సాధించాలనే లక్ష్యంతో టీమిండియా బరిలోకి దిగబోతున్నట్లు మాంబ్రే తెలిపాడు. జట్టులో ఎలాంటి మార్పులు ఉండబోవని సూచనప్రాయంగా మాంబ్రే ధ్రువీకరించడంతో సూర్యకుమార్ యాదవ్, మహ్మద్ షమీ మళ్లీ బెంచ్‌కే పరిమితమయ్యే అవకాశం ఉంది.</div>
<div> </div>
<div>ఐదుసార్లు ప్రపంచకప్ ఛాంపియన్ ఆస్ట్రేలియా, అఫ్ఘానిస్తాన్, చిరకాల ప్రత్యర్థి పాకిస్థాన్‌పై ఘ విజయాలతో ప్రపంచకప్‌లో టీమిండియా ప్రయాణం అప్రతిహాతంగా సాగుతోంది. కీలకమైన, సమర్థమైన ఆటగాళ్లను బెంచ్‌కే పరిమితం చేసే సవాలును కూడా టీమిండియా స్వీకరిస్తున్నట్లు మాంబ్రే తెలిపాడు. ఆ మ్యాచ్‌లో జట్టు ప్రయోజనాలు, మ్యాచ్‌ ఆడే పరిస్థితులు, ప్రత్యర్థి జట్టు బలహీనతలు, వాతవరణ పరిస్థితులు ఇలా చాలా విషయాలు పరిగణనలోకి తీసుకుని తుది జట్టు ఎంపిక ఉంటుందని మాంబ్రే తెలిపారు.షమీ, సూర్యకుమార్ యాదవ్‌, రవిచంద్రన్ అశ్విన్‌లను బెంచ్‌కే పరిమితం చేయడం చాలా కష్టమైన పనని అంగీకరించాడు. వాళ్లు అద్భుతమైన ఆటగాళ్లని గుర్తు చేశాడు.</div>
<div> </div>
<div>మీడియా సమావేశంలో మాట్లాడిన మాంబ్రే గత విజయాల ఊపును కొనసాగించడమే తమ ప్రధాన లక్ష్యమని.. షమీ వంటి నాణ్యమైన ఆటగాళ్లను ప్లేయింగ్‌ లెవన్‌లో ఆడించకపోవడం చాలా కష్టమని అభిప్రాయపడ్డాడు. జట్టు మేనేజ్‌మెంట్ ఇప్పటికే ఆ ఆటగాళ్లతో చర్చలు జరిపినట్లు వెల్లడించాడు. అటువంటి నిర్ణయాలు తీసుకోవడం ఎప్పుడూ సులభం కాదని, కానీ ఆటగాళ్లతో తాము స్పష్టమైన చర్చలు జరిపినట్లు తెలిపాడు. పరిస్థితులకు సరిగ్గా సరిపోయే జట్టును ఎంపిక చేస్తామని మాంబ్రే వ్యాఖ్యానించారు. </div>
<div> </div>
<div>సూర్యకుమార్ యాదవ్‌ ఒక ఛాంపియన్ అని మ్యాచ్ విన్నర్ అని.. కానీ ప్రస్తుత లైనప్‌లో అతనికి స్థానం కల్పించడం ఒక సవాల్‌గా మారిందని మాంబ్రే పేర్కొన్నాడు. గాయం నుంచి కోలుకున్న తర్వాత జస్ప్రీత్ బుమ్రా జట్టులోకి తిరిగి వచ్చి అసాధారణ ప్రదర్శన చేస్తుండడంపై మాంబ్రే హర్షం వ్యక్తం చేశారు. బుమ్రా బౌలింగ్‌తో టీమిండియా బౌలింగ్‌ దళం చాలా మెరుగ్గా కనిపిస్తుందని వ్యాఖ్యానించాడు. కుల్దీప్‌ యాదవ్‌ కూడా అద్భుతంగా రాణిస్తున్నాడని అన్నాడు. కుల్దీప్ వేగం, మెరుగైన ఖచ్చితత్వం ఇప్పుడు అతనిని ప్రత్యేక బౌలర్‌గా నిలిపిందని తెలిపాడు. తాము ప్రతీ మ్యాచ్‌ను సీరియస్‌గానే తీసుకుంటున్నట్లు పరాస్‌ మాంబ్రే స్పష్టం చేశాడు. ఇంగ్లండ్‌ను ఆఫ్ఘానిస్తాన్ ఓడించడం… దక్షిణాఫ్రికాను నెదర్లాండ్స్ ఓడించడాన్ని పరాస్‌ గుర్తు చేశాడు. తాము ప్రతీ ప్రత్యర్థిని గౌరవిస్తామని.. ఆ జట్లకు తగ్గట్లు వ్యూహాలు రచిస్తామని స్పష్టం చేశాడు. </div>
<div> </div>
<div><strong>టీమిండియా ప్లేయింగ్‌ లెవన్(అంచనా):</strong></div>
<div>రోహిత్ శర్మ (కెప్టెన్), శుభ్‌మన్ గిల్, విరాట్ కోహ్లీ, శ్రేయాస్ అయ్యర్, కేఎల్ రాహుల్ (వికెట్ కీపర్), హార్దిక్ పాండ్యా, రవీంద్ర జడేజా, శార్దూల్ ఠాకూర్, జస్‌ప్రీత్ బుమ్రా, కుల్దీప్ యాదవ్, మహ్మద్ సిరాజ్.</div>
Source link
టీమిండియా ఫైనల్ 11 ఇదేనా! , బౌలింగ్ కోచ్ ఏం చెప్పాడంటే..?
